अन्तरिम सरकारकी प्रधानमन्त्री सुशीला कार्की प्रधानमन्त्री बनेपछि मन्त्रिपरिषद् विस्तारका लागि तीव्र रस्साकस्सी चलेको छ । यसै रस्साकस्सीबीच नसोचिएका व्यक्तिहरू मन्त्री बन्ने चर्चा चलेको छ भने भारतीय नागरिकसमेत मन्त्रिपरिषद् प्रवेशको चर्चामा आउनुले विवाद थपिएको छ ।
बिज्ञापन
बिज्ञापन
स्वास्थ्य मन्त्रालयको नेतृत्वका लागि सिफारिस भएकी डा. संगीता मिश्राको नियुक्ति भने अहिले ‘होल्ड’ मा परेको छ । भारतमा जन्मिएकी र विवाहमार्फत अंगिकृत नेपाली नागरिक बनेकी मिश्राविरुद्ध भ्रष्टाचारसम्बन्धी गम्भीर आरोप लागेका कारण प्रधानमन्त्री कार्कीले उनको नाम फिर्ता लिने तयारी गरेको स्रोतले जनाएको छ ।
बिज्ञापन
प्रधानमन्त्री कार्कीले आइतबार राष्ट्रपति समक्ष डा. मिश्राको नाम स्वास्थ्य मन्त्रीका रूपमा सिफारिस गरेकी थिइन् । तर, अख्तियार दुरुपयोग अनुसन्धान आयोगमा उनीविरुद्ध छानबिन चलिरहेको जानकारी पाएपछि विवादित पात्रलाई मन्त्री बनाउन नमिल्ने निष्कर्षमा पुगेकी हुन् ।
डा. मिश्राले मन्त्री बन्ने अपेक्षामा आइतबार नै अतिरिक्त सचिवको पदबाट राजीनामा दिएकी थिइन् । तर, विवाद सतहमा आएपछि उनको मन्त्री बन्ने सम्भावना कमजोर बनेको छ । यसअघि स्वास्थ्य सचिवमा वरिष्ठता मिचिएको भन्दै असन्तुष्ट बनेकी उनले करिब ६ महिना लामो बिदा बसेकी थिइन् र सर्वोच्च अदालतमा रिट समेत दायर गरेकी थिइन् । गत बिहीबार मात्रै उनी मन्त्रालय फर्किएकी थिइन् ।
स्वास्थ्य सेवाकी १२औं तहकी उच्च अधिकारी रहेकी स्त्री तथा प्रसूति रोग विशेषज्ञ डा. मिश्राले यसअघि स्वास्थ्य सेवा विभागको महानिर्देशक, स्वास्थ्य मन्त्रालयको समन्वय महाशाखा प्रमुख, कोशी अस्पताल र प्रसूति अस्पतालको मेडिकल सुपरिटेन्डेन्टको जिम्मेवारी सम्हालिसकेकी छिन् ।
प्रधानमन्त्री कार्कीले शिक्षा मन्त्रीमा महावीर पुन, उद्योग वाणिज्य तथा आपूर्ति तथा भूमिसुधार मन्त्रीमा पूर्वन्यायाधीश अनिलकुमार सिन्हा, कृषिमन्त्रीमा डा. मदन परियार र सञ्चारमन्त्रीमा पत्रकार जगदीश खरेललाई पनि सिफारिस गरेकी थिइन् । तर, डा. मिश्राको सिफारिस विवादित बनेपछि हिजोको मन्त्रिपरिषद् विस्तार स्थगित भएको थियो ।
आज दिउँसो २ बजे मन्त्रिपरिषद् विस्तार गर्दै नयाँ मन्त्रीहरूले शपथ ग्रहण गर्ने तयारी भएको छ ।
भ्रष्टाचार आरोप र अंगिकृत नागरिकताको विवादले डा. मिश्रा मन्त्री बन्ने सम्भावना टुट्यो
